डेटमा गएको प्रहरी दम्पतीले रोक्यो डकैती

writer

सम्पूर्ण

बिहिबार, २२ फागुन २०७६


अघिल्लो शनिबार अमेरिकाको केन्टुकी राज्यका प्रहरी दम्पतीले रेस्टुरेन्टमा हुन सक्ने डकैती रोकेका थिए । एलिजाबेदटावन प्रहरी विभागका अधिकारी निकोल म्याकक्योन र गुप्तचर चेज म्याकक्योन डिनर डेटमा थिए । उनीहरू रेजिङ केन्स चिकेन फिंगर्स नामक रेस्टुरेन्टमा रमाइलो साँझ बिताइरहेका थिए । 

एक जना कालो लुगा र सेतो मास्क लगाएको मान्छे रेस्टुरेन्टमा आयो । रेस्टुरेन्टमा कम ग्राहक थिए । त्यस लुटेराले काउन्टरमा गएर पिस्टोल देखायो । रेस्टुरेन्टका कर्मचारीले काउन्टरमा भएको पैसा उसलाई दिए । 

खानपानमा रमाइरहेको म्याकक्योन दम्पतीले यी सबै दृश्य नियालिरहेको थियो । ‘अब प्रहरीको कर्तव्य निर्वाह गर्नुपर्छ भन्ने निधो गरेर हामी त्यो बदमासलाई तह लगाउन उठ्यौँ,’ निकोलले ‘द वासिङ्टन पोस्ट’सँग भनिन्, ‘डेटमा पनि हामी आखिर प्रहरी नै थियौँ । टुलुटुलु हेरेर कसरी बस्न सकिन्थ्यो ?’ 

म्याकक्योन दम्पती आफूतिर दृढतासहित र डरलाग्दो तरिकाले अगाडि बढेको देखेर लुटेरा पिस्टोल फालेर भाग्यो । उसलाई केही परसम्म लखेटेर प्रहरी दम्पतीले समात्यो । 

लुटेरा लुइसभिल शहरमा बस्ने ३० वर्षीय जस्टिन कार्टर भएको खुल्यो । उनीविरुद्ध प्रहरीले कारबाही गर्दै छ । ‘हामीले प्रहरीको काम गरेका हौँ,’ श्रीमान् चेजले भने, ‘कुनै विशेष र तारिफयोग्य काम गरेका हैनौँ ।’ डेटमा जाँदा पनि प्रहरीको कर्तव्य निर्वाह गर्न नचुक्ने यस दम्पतीको सामाजिक सञ्जालमा अत्यन्त प्रशंसा गरिएको छ । 

तपाईको कमेन्ट

मुख्य समाचार