‘व्यक्तिगत स्वार्थ बोकेर ट्राफिक सडकमा जाँदैनन्’

writer

सम्पूर्ण

शुक्रबार, २२ कार्तिक २०७६


केदार केसी, ट्राफिक प्रहरी 
महानगरीय ट्राफिक प्रहरी महाशाखा, रामशाहपथ, काठमाडौँ

आरामै हुनुहुन्छ, सर ?
आरामै छु। 

ट्राफिक भएर सेवा दिन थाल्नुभएको कति भयो ?
दुई वर्ष भयो। 

सीधै ट्राफिक प्रहरी भएर काम गर्नुभयो कि सिभिल प्रहरी ?
मैले सिभिल प्रहरीमा पनि काम गरेँ। 

कति वर्ष सिभिल प्रहरीमा सेवा दिनुभयो ?
सात वर्ष । 

पढाइ सकियो  ?
छैन। अहिले मास्टर्स गर्दै छु। 

कुन विषयमा मास्टर्स गदै हुनुहुन्छ ?
पोलिटिकल साइन्स। 

पढाइ र जागिर सँगसँगै लैजान गाह्रो हुन्छ होला नि ?
एकदमै गाह्रो हुन्छ। तर, दुवैलाई ब्यालेन्स गरेर मिलाउँदै लैजानुपर्छ। 

परीक्षाको समयमा कसरी म्यानेज गर्नुहुन्छ ?
अफिसमा परीक्षाका लागी ड्युटी मिलाइपाऊँ भनेर निवेदन दिएपछि समय मिल्छ। 

पढ्ने समय कसरी निकाल्नुहुन्छ ? 
राति पढ्छु। पढ्ने मान्छेलाई रातिको ड्युटीमा खटाइँदैन। 

कलेज नगई आफैँ पढेर, बुझेर परीक्षा पास गर्न गाह्रो हुन्न ?
अहिलेसम्म पास गरिरहेको छु। नबुझेको कुरा इन्टरनेटमा हेर्छु। 

यहाँको घर कता पर्‍यो ?
प्युठान। 

यता कता बस्नुहुन्छ ?
अफिसमै बस्छु। 

परिवारमा को–को हुनुहुन्छ ?
आमाबुबा, भाइ, छोरी र श्रीमती। 

सिभिल र ट्राफिक प्रहरीमा आउनुअघि के काम गर्नुहुन्थ्यो ?
यसअघि म शिक्षक थिएँ। भलिबल प्लेयर पनि थिएँ। 

फोर्समा कसरी आइयो ?
सानैदेखि ट्राफिक प्रहरीको काम राम्रो लाग्थ्यो। जीवन राम्रो हुने देखेर यता ट्राई गरेँ। 

जागिरे जीवनबाट सन्तुष्ट हुनुहुन्छ ? 
एकदमै सन्तुष्ट छु। खान–लाउन पुगेकै छ। खुशी छु। 

चालक भन्छन्, ट्राफिक प्रहरीले दुःख दिन्छन्। उनीहरूको भनाइ कति सत्य हो ? 
जसले नियम बुझेको छैन, उसैले यस्तो भन्छ। ट्राफिक प्रहरी व्यक्तिगत स्वार्थ लिएर कहिल्यै सडकमा जाँदैन। चालकको भलाइका लागि हामी खटिने हो।

सडक दुर्घटना के कारणले बढेको जस्तो लाग्छ ?
तीव्र गतिले। 

सिंहदरबार एरियामा ड्युटी गर्न कत्तिको गाह्रो छ ?
गाह्रै छ। यहाँ सवारी साधनको चाप एकदमै बढी हुन्छ। लेन मिलाउन र जाम खुलाउन गाह्रो हुन्छ। 

के भइदिए यो एरियामा काम गर्न सहज हुन्थ्यो ?
ट्राफिक लाइट र चालकमा ट्राफिक नियमसम्बन्धी राम्रो ज्ञान भइदिए काम गर्न सहज हुन्थ्यो। 

ड्युटी गर्ने क्रममा आफन्त वा साथीभाइलाई पनि कारबाही गर्नुभएको छ ?
थुप्रै साथीलाई गरेको छु। मापसे गरेर आएको थियो। मैले आफैँले कारबाही गरेँ। 

साथीहरूको प्रतिक्रिया के हुन्छ ? 
त्यो मेरो ड्युटी हो। ड्युटीले आफन्त र साथीभाइ भन्दैन। उनीहरूका प्रतिक्रियाले कुनै अर्थ राख्दैन। 

तिहार कसरी मनाउनुभयो ?
अफिसमै साथीभाइ र सरहरूसँग मनायौँ। सरहरूको घरमा पहिला नै निम्तो दियौँ र देउसीभैलो खेल्न गयौँ। 

चाडबाडमा घर जान नपाउँदा कत्तिको दुःख लाग्छ ? 
पहिले लाग्थ्यो। अहिले त कामै यस्तो हो भनेर चित्त बुझाइन्छ। 

परिवारले दुःख मान्दैनन् र ? 
आमाबुबा ‘सकेसम्म मिलाएर घर आइजो’ भन्नुहुन्छ । तर, अब त परिवारलाई पनि बानी परिसक्यो। ‘यसको जागिरै यस्तो हो’ भनेर चित्त बुझाउनुहुन्छ। 

सार्वजनिक बिदाको दिन सडकमा काम गर्न सजिलो हुन्छ होला नि ? 
कम गाडी गुड्दा सजिलो त हुन्छ नै। 

प्रस्तुतिः आशक्ति फुयाल 

तपाईको कमेन्ट

मुख्य समाचार


पपुलर पोस्ट


छुटाउनु भयो कि