वर्षाको मौसममा भान्छामा कीरा–फट्यांग्रा लाग्ने डर रहन्छ। तिनले चामल, गहुँ, दाललगायत अनाजलाई नोक्सानी पुर्‍याउँछन्। त्यसैले बर्सातमा यी अन्नको हेरचाह आवश्यक छ।

चामल बचाउने नीमको पात

भाँडामा चामल खन्याउनुअघि नीमका केही पात राख्नुपर्छ। नीमका सुकेका पातलाई सबैभन्दा तल राखेर त्यसमाथि चामल राख्नुपर्छ। चामल भरिएपछि माथि पनि नीमका सुकेका केही पात राख्नुपर्छ। यसो गर्दा चामलमा कीरा लाग्ने सम्भावना कम हुन्छ। कीरा भएमा पनि नीमका पात खाएर मर्न सक्छन्।  

तेलले गर्छ दालको सुरक्षा

दाललाई दुईचार महिनासम्म बचाउन त्यसमा अलिकति तोरीको तेल दल्नुपर्छ। दालमा तेल लगाएर केही बेर घाममा सुकाएर राख्दा त्यसमा कीरा लाग्दैन।

गहुँ बचाउन प्याज

गहुँलाई कीरा लाग्नबाट बचाउन प्याज प्रयोग गर्न सकिन्छ। सय केजी गहुँका लागि आधा किलो प्याज राख्नुपर्छ। गहुँको भाँडोमा सबैभन्दा मुनि, बीचमा र सबैभन्दा माथि प्याज राख्दा त्यसमा कीरा लाग्दैन। 

मसलाले बचाउँछ गहुँ

गहुँको पिठो र चामललाई कीराबाट बचाउन खुर्सानी र नुन डिब्बामा राख्नुपर्छ। खाने नुनलाई सुतीको कपडामा बाँधेर गहुँको भाँडोमा तल, माथि तह बनाउँदै राख्नुपर्छ।