लिंग उत्तेजित नहुने समस्या

writer

डा. सुमनराज ताम्राकार

शुक्रबार, ०६ बैशाख २०७६


धेरैजसो पुरुषले आफ्नो जीवनकालमा एक न एक पटक लिंग उत्तेजित नहुने समस्या अनुभव गरेको हुन्छ। सफल यौन क्रियाका लागि लिंग राम्रोसँग उत्तेजित हुनु जरुरी छ भने सन्तान उत्पादनका लागि उत्तेजित लिंगका माध्यमबाट योनिमार्गमा वीर्य स्खलन हुनु जरुरी छ।

लिंग उत्तेजित नहुने समस्याका कारण यौन सम्पर्क सफलतापूर्वक स्थापित हुँदैन। जसले गर्दा सन्तान उत्पादनमा समस्या आउने गर्छ। लिंग उत्तेजना नहुने समस्या भएका व्यक्तिलाई नपुंसक भनिने गरेको छ। जुन पूर्णतया गलत हो। किनकि, आधुनिक चिकित्सा विज्ञानमा कृत्रिम गर्भाधान प्रक्रियाबाट पनि सन्तान उत्पादन कार्य सम्भव भएको छ।

यस प्रक्रियामा लिंग उत्तेजित नहुने समस्याबाट पीडित व्यक्तिको वीर्य प्रयोग गर्न सकिन्छ। भाइब्रेटरलगायत उपकरणबाट स्खलन गराई वा प्रभावित व्यक्तिको अण्डकोष एवं इपिडिडाइमिसबाट वीर्य संकलन गरी उपयोग गरिन्छ। किनकि, कतिपय व्यक्तिमा हस्त मैथुन गर्न समस्या नहुने तर यौन सम्पर्क राख्न खोज्दा समस्या पर्ने हुन्छ।

लिंग उत्तेजना नहुने समस्या पनि व्यक्तिपिच्छे, प्रत्येक पटकको यौन कार्यपिच्छे तथा यौन सम्पर्क राख्न खोज्ने पार्टनर (श्रीमती वा व्यावसायिक यौनकर्मी) पिच्छे फरक–फरक हुन सक्छ।

यौनजन्य सामग्री, साधन वा वातावरणको परिकल्पना, स्पर्श, दृश्य, गन्ध, स्वाद वा ध्वनिबाट प्राप्त सूचनाबाट मस्तिष्कले उचित विश्लेषण गरी पुरुषमा यौन उत्तेजना तथा लिंग उत्तेजनाको कार्य अघि बढ्छ। कसका लागि कुन सामग्री वा वातावरण चाहिँ यौन उत्तेजक हो, यो व्यक्ति विशेषमा भरपर्ने कुरा हुन्।

दैनिक जीवनका अन्य क्रियाकलापभैmँ यौन क्रियाकलापका लागि आवश्यक निर्देशन मस्तिष्कले प्रदान गर्छ। त्यसो भएर यौन सम्पर्क अर्थात् यौन सम्बन्ध शारीरिक जस्तो देखिए पनि मानसिक पक्ष पनि उत्तिकै महत्त्वपूर्ण हुन्छ। त्यसैले लिंग उत्तेजित नहुने समस्याका कतिपय कारण प्रभावित व्यक्तिको मानसिक एवं मस्तिष्क तथा स्नायु प्रणालीसँग सम्बन्धित छ।

जीर्ण खालका शारीरिक रोग, मेरुदण्ड वा जननेन्द्रिय वरिपरि गम्भीर चोट वा जटिल शल्यक्रिया एवं कतिपय औषधिले पनि लिंग उत्तेजनामा समस्या गराउन सक्छ। एलर्जी, रक्तचाप तथा मानसिक समस्याका लागि उपयोग गरिने कतिपय औषधि लिंग उत्तेजित नहुने समस्याका कारण हुन सक्छन्। यसका साथै पार्किन्सन्स तथा क्यान्सरका कतिपय औषधि पनि कारक हुन सक्छन्।

सफलतापूर्वक यौन सम्पर्क स्थापित गर्न स्वस्थ शरीरसँग मन–मस्तिष्क पनि स्वस्थ हुनुपर्छ। त्यसैले थकित, अधिक मद्यपान, पिर, चिन्ता, डर, त्रास, मनमुटाव, निःसन्तान एवं नपुंसकताको हीनताबोध, आत्मविश्वासको कमी, प्रतिकूल वातावरणका बेला लिंग उत्तेजित नहुने समस्या उत्पन्न हुन सक्छ। सुरुदेखि नै उत्तेजनाको समस्या छ भने कारक तत्त्व शारीरिक हुन सक्छ। अन्य बेला राम्ररी उत्तेजित हुने लिंगमा कहिलेकाहीँ मात्र उत्तेजनाको समस्या हुन्छ भने कारक तत्त्व मानसिक हुन सक्छ।

लिंग उत्तेजित नहुने समस्याको उपचार कारक तत्त्वअनुसार गर्नुपर्ने हन्छ। एकाध पटक मात्र यस्ता खाले यौन दुर्बलता देखिए खासै चिन्ता मान्नु पर्दैन। यौन साथीको सहयोग र समझदारीका साथै गोप्यताको निश्चितता एवं तनावरहित वातावरणले धेरै हदसम्म यो समस्या कम गराउँछ।

यौन साथीले नै गिज्याउने स्थिति आयो भने पक्कै पनि नतिजा राम्रो निस्किँदैन। त्यसैले एकदुई पटक यस्तो खाले यौनिक दुर्बलतापछि आफ्नो यौन साथी समक्ष यौन क्षमता प्रदर्शन गर्नुपर्ने दबाबका बेला भने विपरीत परिणाम हात लाग्छ।

यौनसँग हस्तमैथुन, विवाहपूर्व यौन सम्बन्ध, व्यावसायिक यौनकर्मीसँगको यौनसम्बन्ध, कुनै जटिल खालको यौन संक्रमणको आशंकाका कारण अपराधबोध हुँदा पनि कालान्तरमा लिंग उत्तेजित नहुने समस्या देखिन्छ। 

यदि मानसिक कारणले लिंग उत्तेजित नहुने समस्या भएको भए यौन आनन्दका वैकल्पिक उपाय प्राक्क्रीडाबाट पीडित व्यक्तिमा आत्मविश्वास बढाउन सकिन्छ। यस्ता खाले उपायले यौन दुर्बलता घटाउन मद्दत गर्छ। उदाहरणका लागि हस्तमैथुनका बेला लिंग उत्तेजित नहुने समस्या छैन तर यौन सम्पर्क राख्न खोज्दा यस्तो समस्या हुने व्यक्तिले आफ्नो यौन साथीमार्पmत हस्तमैथुन गराउन लगाएको खण्डमा दुवैको आत्मविश्वास बढ्न गई भविष्यमा यौन कार्यमा सकारात्मक परिणाम निस्कन्छ।

विवाहलगत्तै तथा दाम्पत्य जीवनमा चिसोपन आउनेबित्तिकै हनिमून वा कुनै नयाँ गन्तव्यमा रात बिताउने हिसाबले जाँदा पनि फाइदा पुग्छ। कतिपय औषधिका कारणले यस्तो खाले समस्या भइरहेको भए सम्बन्धित चिकित्सकको सल्लाहमा यौन कार्यलाई असर नपु¥याउने फरक औषधि सेवन गर्नुपर्छ। 

कतिपय अवस्थामा लिंग उत्तेजनालाई बल पु¥याउने औषधि, उपचारको आवश्यकता पर्न सक्छ। योहिम्बिन, शिलाजीत, जिन्सिङ, यार्सागुम्बाजस्ता परम्परागत एवं भिएग्रा, सियालिस, लभित्राजस्ता आधुनिक औषधिले सकारात्मक  परिणाम पाउन सकिन्छ। भिएग्रालगायत औषधिले लिंगमा रक्तप्रवाह बढाई उत्तेजना ल्याउँछ।

विशेष परिस्थितिमा भ्याकुम, इम्प्लान्ट, इन्जेक्सनको आवश्यकता पर्न सक्छ। व्यक्तिपिच्छे कारण फरक, एकै व्यक्तिमा थुप्रै कारण हुने हुनाले यी औषधि, उपचार वा विधिले सबै व्यक्तिलाई ठ्याक्कै एकैखाले वा सकारात्मक नतिजा नै निस्कन्छ भन्ने चाहिँ हुँदैन। 

तपाईको कमेन्ट

पपुलर पोस्ट


छुटाउनु भयो कि